Como din na súa nota introdutoria os autores neste magnífico ensaio que "entrou en sociedade" en 1995, ano dedicado pola Real Academia Galega ao autor de Rianxo-: "Rafael Dieste pertence a esa excepcional aristocracia de escritores que protagonizan duas situacións certamente contraditorias: dunha parte é incuestionabelmente minúscula a sua presenza editorial, o seu coñecemento, a divulgación da sua obra; doutra e en virtude non só da sua peripécia vital senón sobretodo do seu alto significado intelectual e literário, Dieste é xa un deses autores imprescindíbeis en calquer censo digno e un literato oxixenante nos dous ámbitos culturais e idiomáticos nos que a sua produción se torna relevante: o que se expresa en lingua galega e o que o fai en lingua española".

Unha simple ollada ao máis destacado do seu índice, indícanos que, pese a súa concreción, derivada do obxectivo divulgativo e sintético procurado polos autores no ensaio, este estudo representa un material imprescindíbel para coñecer a Dieste e un verme de curiosidade para achegarnos, se cadra o máis importante, a súa obra.