Este manual pretende achegar o estudante ao mundo real da xestión e administración de empresas por medio da utilización de documentos e procesos que abranguen a esfera contábel, financeira, fiscal e laboral, eidos todos eles interrelacionados e polos que chegamos a coñecer o estado patrimonial, financeiro e económico das empresas.

O obxectivo último é comprender de xeito global as distintas competencias profesionais do título de Técnico Superior en Administración e Finanzas, abordadas nos módulos que compoñen o deseño curricular do ciclo. Proponse, como instrumento principal para o desenvolvemento da aprendizaxe, a realización dunha simulación de actividades levadas a cabo na empresa. Para isto achéganse os documentos de traballo necesarios, favorecendo a utilización, neste proceso, de medios e aplicacións informáticas.

A obra comeza enunciando o exercicio a realizar. En primeiro lugar, creamos unha pequena empresa de alimentación, proceso no que podemos contemplar a posta en marcha e as operacións habituais dun empresario individual. Despois dun tempo (tres trimestres) contemplamos unha ampliación do negocio e unha transformación do mesmo en sociedade de responsabilidade limitada, ampliando o número de socios e a súa actividade. Desta maneira podemos analizar e comparar a problemática e particularidades de ambos tipos de empresas.

Nunha segunda parte ofrécese a documentación e material complementario necesarios para a resolución do suposto. Entre eles están as escrituras de constitución e estatutos sociais, contratos de arrendamento, convenio colectivo do sector, documentación bancaria etc.

Rematamos cun anexo no que presentamos unha serie de esquemas referentes á constitución e fiscalidade das empresas.